Кулун тутар 31 күнүгэр Чараҥ нэһилиэгэр олус истиҥ көрсүһүү буолан ааста. Бу күн «Ытык сүбэ» түмсүү (сал. С. И. Бочкарева) кыттыылаахтара уонна Дьокуускай куораттан кэлбит Октябрьскай уокурук бэтэрээннэрин сэбиэтин (сал. В. И. Петрова), «Көмүлүөк» түмсүүтүн (сал. А. А. Михайлова) кыттыылаахтара көрсүһүүлэрэ буолла.
Тэрээһин сүрүн соругунан – түмсүүлэр икки ардыларыгар ситими олохтооһун, айар үлэҕэ сатабыллары үллэстии уонна санаа атастаһыыта буолар. Түмсүүлэр бэйэлэрин сатабылларын, иистэрин, оҥоһуктарын холбоон “Кэрэни кэккэлээн” быыстапка туруордулар, иллэҥ кэмнэрин хайдах туһалаахтык атааралларын туһунан үллэһиннилэр. Дьокуускай куорат бэтэрээннэрин түмсүүлэрэ бэйэлэрин үлэлэрин-хамнастарын билиһиннэрдилэр, оттон чараҥнар ыалдьытымсах майгыларынан уонна нэһилиэк олоҕор көхтөөх кыттыыларынан сөхтөрдүлэр, итии чэйдээх остуол тула олорон нэһилиэк историятын билиһиннэрдилэр. Ол кэннэ ыалдьыттар З. В., И. В. Мигалкиннар тэрийбит Кулантай аатынан уран сурук түмэлигэр сырыттылар. Ыалдьыттар истэриттэн СӨ норуотун бэйээтэ Иван Мигалкинныын Бүлүү педучилищетыгар бииргэ үөрэммит доҕотторо баар буолан истиҥ ахтылҕан, кини туһунан кэпсэтии тэрилиннэ. Түмүккэ И. Мигалкин доҕотторугар анаан суруйбут анабыл хоһооннорун ааҕан иһитиннэрдилэр.
Киэһэнэн холбоһук ырыа-тойук, үҥкүү-битии аргыстаах кэнсиэр көрдөрөн көрсүһүү күнүн сэргэхтик уонна туһалаахтык атаардылар. Маннык көрсүһүүлэр кырдьаҕас дьоҥҥо күүһү-уоҕу уонна үтүө санааны биэрэллэр. Кинилэр олоххо көхтөөх санааларын бигэргэтэллэр. Чараҥ сиригэр буолбут бу көрсүһүү икки өттүттэн өссө да дириҥ доҕордоһуу төрүөтэ буолуоҕа диэн эрэнэбит.
