Бүгүн, муус устар 7 күнүгэр, Мүрү алаас иһигэр ийэ тылбыт туһугар сүрэхтэрин ууран үлэлиир дьон истиҥ көрсүһүүтэ буолла. Ылдьаа Нохуоккун аатынан култуура киинигэр Дьокуускай куоракка олорор биир дойдулаахтарбыт улуустааҕы “Кэскил түһэ” түмсүү салайааччыта С. М. Бурцеваны кытта нэһилиэкпит олохтоохторун уонна оҕолорун кытта көрүстүлэр. Күндү ыалдьыттарбыт – “Ил Түмэн” хаһыат шеф-эрэдээктэрэ, 2008-2023 с.с. СӨ суруналыыстарын сойууһун бэрэссэдээтэлэ Галина Бочкарева, СӨ норуодунай артыыһа Владимир Заболоцкай, бэйээт, психолог, суруналыыс Яна Байгожаева, норуот үөрэҕин тарҕатааччы, “Олох үөрэҕэ” норуот педагогикатын киинин салайааччыта Татьяна Жиркова уонна Өрөспүүбүлүкэтээҕи лицей-интернат дириэктэрин иитэр-үөрэтэр үлэҕэ солбуйааччыта Лена Федорова – сахалыы тыыннаах эйгэни тэрийии туһунан дириҥ ис хоһоонноох кэпсэтиилэри ыыттылар. Бу көрсүһүү ийэ тылбыт кэскилин туһунан толкуйдаах дьону түмтэ. Олохтоох салалта, тылы харыстааһыҥҥа, сайыннарыыга үлэлэһэр үөрэх уонна култуура тэрилтэлэрэ, дьоно-сэргэтэ төрөөбүт тылбыт сайдарыгар, кэлэр көлүөнэ сахалыы саҥарарыгар төһүү күүс буолан сахалыы эйгэни дьиэттэн саҕалаан кэҥэтии – хас биирдиибит ытык иэспит буоларын бигэргэттэ.
