Тохсунньу 22 күнүгэр Ылдьаа Нохуоккун аат. Чараҥ култууратын киинигэр 1-кы Хоро нэһилиэгэр Саха өрөспүүбүлүкэтигэр биллэриллибит Култуура сыла үөрүүлээхтик аһылынна. 1-кы Хоро нэһилиэгэр үс култуура тэрилтэлэрэ айымньылаахтык үлэлииллэр: И.И. Находкин аат. Чараҥ култууратын киинэ (сал. Г.Н. Свинобоев), К.А. Неустроева аат. олохтоох библиотека (сал. А.А. Хабарова), В.А. Протодьяконов-Кулантай аатынан улуустааҕы литэрэтиирэ түмэлэ (сал. К.А. Крылова). Үөрүүлээх тэрээһин “Көтөр устар аал” нуучча остуоруйатынан туруоруллубут «Манчаары» тыйаатыр устуудьуйатын (сал. Е.П. Свинобоева) испэктээгинэн түмүктэннэ. Сүрүн оруолларга оонньоотулар: Ыраахтааҕы – Петр Копырин, Забава – Мария Андросова, Олеся Крылова, Полкан – Гаврил Свинобоев, Баанньа – Харысхан Корнилов, Уукай (Водяной) – Павел Охлопков, Баҕачааннар – Эрчим Корнилов, Илья Румянцев, Дьэгэ-Баабалар – Татьяна Свинобоева, Анна Хабарова, Нарыйа Алексеева, Күннэй Румянцева. Маассабай сыанаҕа – Татьяна Свинобоева, Вера Сивцева, Анна Хабарова, Нарыйа Алексеева, Күннэй Румянцева, Александр Васильев, Харысхан Корнилов, Эрхан Филиппов, Эрчим Корнилов, Илья Румянцев кыттан, уобарастарын итэҕэтиилээхтик арыйдылар. Сүрүн оруоллар көстүүмнэрин – Уус Алданнааҕы киин балыаһа сиэстэрэлэрин салайааччы А.И. Алексеева айан, уустаан-ураннаан тигэн күүс-көмө буолла. Киниэхэ истиҥ махталбытын тиэрдэбит! Култуура тэрилтэлэрэ бу сыл соругунан култуурунай нэһилиэстибэни харыстааһыны, култуура уонна үскүүстүбэ айар күүһүн кэм тыынынан сайыннарыыны, нэһилиэк хас биирдии олохтооҕор уонна үүнэр көлүөнэтигэр култуура үтүө үгэһин иҥэринии ылыннылар.
