Муус устар 7 күнүгэр Бороҕоҥҥо ураты тэрээһиҥҥэ — «Бииргэ — 20 сыл» диэн өйөбүл марафоҥҥа кыттыыны ыллыбыт. Бу тэрээһин «Уус-Алданнааҕы социальнай-реабилитационнай киин» тэриллибитэ 20 сылыгар ананна. Марафон үөрүүлээх арыллыытынан саҕаланан, ыалдьыттарга — тэрилтэ социальнай партнердарыгар киин үлэтин-хамнаһын билиһиннэрэр экскурсия ыытылынна. Салгыы «Оҕо — олох сибэккитэ» диэн сырдык, сылаас ис хоһоонноох акция буолла. Ону таһынан, киин ыалдьыттара уонна тэрилтэ үлэһиттэрэ «Үтүө суолунан» стратегическай сессияҕа тэрилтэ инникитин сайдар суоллары торумнаатылар. Бу 20 сыл тухары киин элбэх оҕоҕо уонна ыалга эрэллээх тирэх, көмөлөһөөччү, амарах санаа дьиэтэ буолбут. Бу марафон тэрилтэ үбүлүөйдээх сылын көрсөргө, салгыы ситиһиилээхтик үлэлииригэр саҥа күүс-уох биэрдэ.
